Творчую справаздачу трымаў узорны хор Астравецкай дзіцячай школы мастацтваў "Ветразь"




Дата канвертавання11.05.2016
Памер13.61 Kb.
Творчую справаздачу трымаў узорны хор Астравецкай дзіцячай школы мастацтваў “Ветразь”.

Як заўсёды, хор парадаваў выдатным выканаўчым майстэрствам, чысцінёй дзіцячых галасоў, багаццем і разнастайнасцю рэпертуару. Прагучалі руская народная песня “Жавороночки”, твор вядомага беларускага этнографа, фалькларыста, кампазітара і дырыжора Рыгора Шырмы “Перапёлачка”, некалькі беларускіх песень для дзяцей і англійская – “Вясковы хлопчык”, “Добрыя казкі дзяцінства” Яўгена Мартынава. І вядома, класіка – хор з першай дзеі оперы Вілібальда Глюка “Арфей”, твор Эдварда Грыга “Кветкі гавораць”, Цэзаря Кюі “Зара ляніва дагарае”, два творы Пятра Чайкоўскага з вакальнага цыклу для дзяцей – “Калыханка” і “Бура”. Акапельнае і ў суправаджэнні канцэртмайстра Алены Генрыхаўны Раткевіч выкананне, пяшчотныя дзіцячыя галасы краналі душу. А салісткі Мілена Станкевіч, Эльміра Жукоўская, Аліна Гацук, Кацярына Юркойць уражвалі сваім талентам.



Даўно і шчыра люблю гэты музычны калектыў, назіраю за яго творчым ростам больш за 20 гадоў. Ганаровае званне “ўзорнага” ён пацвярджае напружанай працай з году ў год, паказвае свой вялікі творчы патэнцыял. І гэта не можа не радаваць шчырых прыхільнікаў “Ветразя”. Яму наканавана заўсёды быць юным, хаця ўжо выляцеў у самастойнае жыццё не адзін яго склад. Многія былыя выхаванцы хору звязалі сваё жыццё з музыкай, песняй. У адным з ваенных аркестраў спявае Ала Рыпінская, сталі выкладчыцамі музыкі Святлана Краснова, Ірына Бордак, Злата Кіткевіч, Аксана Баршэвіч, Наталля Вянгроўская. Харавым дырыжорам – Надзея Хвядук. Гэта несумненна добры вынік. Але галоўнае ўсё ж тое, што дзецям з малых гадоў прывіваецца выдатны густ, даюцца ўзоры сапраўднай музыкі, народжанай таленавітымі кампазітарамі мінулага і сучаснасці.

На змену выпускнікам штогод прыходзяць малодшыя вучні, і пад кіраўніцтвам нязменнага капітана Ірыны Анатольеўны Волчэк “Ветразь” адпраўляецца ў чарговае плаванне па хвалях бяскрайняга музычнага акіяну. Спадарожнага ветру!


База данных защищена авторским правом ©shkola.of.by 2016
звярнуцца да адміністрацыі

    Галоўная старонка