Першы урок у 2-м класе




Дата канвертавання15.05.2016
Памер77.43 Kb.
Першы урок у 2-м класе
Гэты ўрок – гэта першы ўрок пасля летніх канікул. Вучні праз гульню ўваходзяць пасля адпачынку ў навучальны працэс,праяўляюць свае здольнасці і навыкі, адчуваюць сябе ўтульна, бо побач з імі самыя родныя людзі: не толькі аднакласкнікі і настаўнік, але і іх бацькі. І ўсе адчуваюць сябе грамадзянамі Рэспублікі Беларусь.
Клас: 2.

Дата: 1 верасня.

Прадмет: літаратурнае чытанне (беларускае).

Тэма: Уводзіны. Урок пісьменнасці.

Мэта: стварыць умовы для фарміравання свядомага вывучэння беларускай мовы, для фарміравання нацыянальнай свядомасці; далучаць дзяцей да жыцця праз мастацтва роднага слова; развіваць і актыўна фарміраваць культуру мовы і паводзін, добразычлівыя адносіны паміж бацькамі і дзецьмі.

Форма урока: разгадванне сакрэтаў.

Падрыхтоўка да ўрока:

1). Зрабіць выставу дзіцячых кніг, часопісаў і газет на беларускай мове.

2). У кожнага вучня на парце ляжыць падручнік па літаратурнаму чытанню для 1(2) класа агульнаадукацыйнай школы з беларускай мовай навучання (Васіль Вітка, Марыя Шаўлоўская. Роднае слова.)

3). Падрыхтаваць канверты – САКРЭТЫ з адпаведным матэрыялам.

4). Зрабіць выставу карцін, малюнкаў, фотаздымкаў пра Беларусь.

5). Загадзя пагутарыць з бацькамі, даць рэкамендацыі, як прыгожа выказаць перад дзецьмі свае думкі на беларускай мове.


Ход урока:

- Сёння вы, дзеткі, прыйшлі ў школу пасля летняга адпачынку, каб прадоўжыць сваё навучанне. Разам з вамі прыйшлі і вашы бацькі. Сардэчна ўсіх вас вітаю і жадаю вам поспехаў і добрага настрою. Бо каб добра вучыцца, трэба быць вясёлымі! Так? (Так.)

- А я вам нешта падрыхтавала. (Паказваю канверты, на якіх надпісы: “САКРЭТ 1”, “САКРЭТ 2”, …) Як вы думаеце, што мы будзем рабіць? (Разгадваць сакрэты.) Правільна! Малайцы!

- А пачнем мы з САКРЭТА №1. Права адкрыць гэты сакрэт будзе таму, хто адгадае загадку аб прафесіі:

Краіна ведаў існуе.

Мне люба адкрываць яе

Дзяўчынкам, хлопчыкам штораз,

Ведучы іх з класа ў клас. (Настаўнік)


- Малайчына! Вось табе канверт, раскрый яго і раскажы, што там? (Тут літары!) Выставі іх у радок, называючы кожную. Што ты можаш пра іх сказаць? (Звяртаюся да класа): А вы слухайце ўважліва і дапамагайце яму, калі спатрэбіцца. (Тут 8 літар: адна з іх вялікая, а астатнія маленькія; 3 галосных, 5 зычных; а з літар можна скласці слова, якое будзе пачынацца на “Б”, таму што вялікая літара можа стаяць толькі ў пачатку слова… А слова атрымалася “Беларусь”.) Дзякуй усім за такую старанную работу!
-Так, гэта слова Беларусь. А што гэта такое? (Гэта назва нашай рэспублікі.) Гэта наша Радзіма, наша Бацькаўшчына. Гавораць, што такую назву яна атрымала ад прыгажосці акаляючых краявідаў (раскрываю падрыхтаваныя на дошцы карціны, фотаздымкі, малюнкі дзяцей); ад мноства снегу, што выпадае зімой у нашай старонцы; ад перавагі белага колеру ў адзенні насельніцтва (паказваю беларускае народнае адзенне); ад таго, што людзі, якія тут жывуць, светлавокія, статныя, прыгожыя. Вы проста паглядзіце адзін на аднаго, на сваіх бацькоў, на знаёмых, усміхніцеся адзін аднаму. Якія вы ўсе прыгожыя! А як мы сябе называем як народ? (Беларусы). А на якой мове мы размаўляем, пішам, чытаем? (На беларускай, рускай, нямецкай, …). Так, людзі могуць размаўляць на розных мовах. Але ў кожнага народа ёсць свая родная мова. А якая з гэтых моў з’яўляецца нашай роднай мовай? (Беларуская.) Малайцы!
- А мова, калі на ёй не размаўляць, можа загінуць назаўсёды! І вы павінны пра гэта памятаць. А загіне мова – загіне і народ. Ён проста перастане існаваць, нават без вайны. Таму мы вывучаем сваю і іншыя мовы, каб ведаць розныя народы, розных людзей; каб пазнаёміць іншых са сваім народам, са сваёй мовай. Раней вам дапамагаў ЛЕМАНТАР. А ў гэтым годзе вы будзеце разам з новым падручнікам, які як называецца? (Паказваю падручнік, а вучні хорам чытаюць назву:РОДНАЕ СЛОВА). І свой першы урок у новым годзе мы пачынаем на сваёй роднай беларускай мове! А дома вы гэты падручнік пагартаеце, разгледзіце яго старонкі – гэта ваша дамашняе заданне.
- А зараз паспрабуйце разгадаць САКРЭТ №2. Права адкрыць гэты сакрэт будзе таму, хто адгадае першым наступную загадку:

Крылаў не мае,

Ды хутка лятае.

Выпусціш –

Рад ці не рад,

А не зловіш назад.

(Слова)

-Малайчына! Вось табе канверт. (Тут таксама літары. (Ідзе работа, аналагічная папярэдняму заданню) … Бракава.)



-Правільна! Гэта наша з вамі Радзіма ў больш канкрэтным сэнсе. А што вы ведаеце пра нашу вёску? Што можаце пра яе расказаць? Чым яна вам падабаецца? Што цікавага адбылося з вамі ў час канікул? (У размову можна уключыць і бацькоў, каб расказалі нешта цікавае для дзяцей і абавязкова на беларускай мове. Напрыклад, пра сваю прафесію, пра цікавы выпадак у час канікул.)

-Тут яшчэ ў нас ёсць САКРЭТ №3. Каб адкрыць яго, трэба зноў адгадаць загадку. Будзьце ўважлівымі!

Хто са мною пасябруе,

Той са мной не засумуе.

Языка хоць і не маю,

А пра ЎСЁ апавядаю. (Кніга)


-Малайчына! Вось табе канверт. (Тут яшчэ два маленькіх канверцікі з каляровымі лісточкамі, а на іх штосьці напісана!)

-Усё правільна. Лісточкі з першага канверціка ты раздай бацькам, а з другога я раздам вучням. (Калі бацькоў меней, то можна раздаць вучням. Калі вучняў многа, то можна аддаць адну паперку на парту.) Зараз уважліва прачытайце пра сябе кожны тое, што атрымалі. А цяпер слухайце заданне! Мы пагуляем у гульню “Складзём прыказку”. Вы ўжо ведаеце, што ў каго напісана, застаецца толькі знайсці сваю палавінку. А рабіць будзем так: чытаць пачынаюць бацькі, таму што ў іх пачаткі прыказак. Выходзяць яны па чарзе (напрыклад,як сядзяць або па жаданню) і выразна чытаюць, а вучань, які лічыць, што ў яго працяг – выходзіць і чытае сваю частку. Калі ўсё правільна, то апладуем ім і хорам паўтараем прыказку. А калі няправільна, то маўчым, а вучань сядае на месца.

П р ы к а з к і:

Калі рукі ды ахвота, то і спорыцца работа.

Хто не сее, у таго не расце.

Хто дбае, той і мае.

Любіць увесь свет лагодны прывет.

Нашы сябры – па ўсёй зямлі.

Рабі тое другому, што хочаш, каб рабілі табе.

Усюды добра, а дома лепей.

Дзе маці нарадзіла, там і Радзіма.

Не трэба салавейку залатая клетка, а трэба салавейку зялёная ветка.

Слоўка як птушка: выпусціш – не вернеш.

Добра працуеш – Радзіму мацуеш.

Няма смачнейшае вадзіцы, чым з роднай крыніцы.

-Як добра вы папрацавалі разам! Малайцы! А вось новы САКРЭТ - №4.

Права адкрыць гэты канверт атрымае той, хто хутчэй усіх і без шума зробіць 10 прысяданняў па маёй камандзе і падыме рукі высока ўгору. А нашы шаноўныя бацькі будуць за вамі сачыць. Увага! На лік “тры” пачынайце:раз, два, тры!

-Ты аказаўся самым спрытным, малайчына! Вось табе канверт. (Тут паперкі з вершыкамі і малюнкі да іх). Так. Раздай гэтыя паперкі з малюнкамі на кожную парту. А зараз увага! Гэта не проста вершыкі, а вершыкі з заданнямі. А заданне такое – выключэнне лішняга. Вы павінны знайсці і назваць лішняе слова і растлумачыць, а чаму ж яно лішняе. А для гэтага вы павінны прыгожа прачытаць свой вершык-заданне, паказваючы малюнкі, і выслухаць адказ класа, а потым растлумачыць сваю версію. На гэта я даю вам некалькі хвілін, рыхтуйцеся. Калі камусьці цяжка справіцца самому, то можаце падыйсці да бацькоў або да мяне, толькі рабіце ўсё ціха, нікому не мяшаючы.

зараз давайце паслухаем, што ж у нас атрымалася:

Прачытай, падумай, кемнасць праяві

І прадмет чацвёрты – лішні – назаві

Ў словах невялікага радка:

Яйкі, мяса, сподак і мука. (Сподак)
Ўсе мы ведаем асіну,

Клён, бярозу ды каліну.

І ў радочку гэтым нашым,

Што тут лішняе, мы скажам. (Каліна)


Вось цікавы вам яшчэ радок:

Кацялок, гаршчок, часнок, збанок.

Што не падыходзіць – хто гатоў

Выбраць лішняе ўжо з гэтых слоў? (Часнок)


Прыгожы вось такі яшчэ радок:

Рамонак, ружа, лён і васілёк.

Хаця наш зрок чатыры ўсе лагодзяць,

Але адно тут штось не падыходзіць. (Лён)

Раніца, вечар, ды тыдзень, ды ноч –

Ўсё тут да ладу, лагічна, апроч

Слова-паняцця, бадай аднаго.

Вось і падумай тут, што да чаго. (Тыдзень)


Снег і вецер,

Дождж і град –

Што тут, дзеці,

Неўпапад? (Вецер)

Булка, хлеб,ды нож, ды каравай –

Лішняе без спешкі выбірай. (Нож)


Прапаную словы я такія:

Ніна, Каця, Жучка і Марыя.

Ну, а ты задумайся на міг

І скажы, хто будзе лішні з іх. (Жучка)


Ведаеш ты іх, канешне:

Морква, боб, гарбуз, чарэшня.

Калі ў думках ты увішны –

Выключыш чацвёрты лішні. (Чарэшня)


Вось чатыры ёсць прадметы:

Крупнік, збан, кісель, катлеты.

Лішняе – ану давай –

З іх без спешкі вызначай. (Збан)

-Вось яшчэ з адным сакрэтам мы справіліся. Усім дзякуй за працу. А вось яшчэ новы САКРЭТ пад №5. Я яго адкрыю сама. Дазваляеце? (Дастаю з канверта папяровыя маскі да казкі “Рэпка”). Ой, што гэта? А колькі павінна быць у гэтай казцы герояў? (Сем) Правільна. Вы добра памятаеце гэту казку? (Так) Давайце яе праінсцэніруем. (Дзеці разбіраюць ролі і паказваюць казку.) Малайцы! А якія вы яшчэ ведаеце беларускія казкі? (Як Курачка Пеўніка ратавала. Як птушкі вучыліся будаваць гнёзды. …)

-Наступны канверт: САКРЭТ №6 адкрые той, хто першым адкажа на наступнае пытанне. Як называецца наш беларускі часопіс для дзяцей, у назве якога ёсць усе колеры? (Вясёлка).

-Правільна! Гэты часопіс многія з вас выпісваюць і вы з ім добра знаёмыя. І ён ёсць у нас на нашай кніжнай выставе. А цяпер адкрывай, калі ласка, канверт. (Тут партрэты.) А хто гэта такія? (Янка Купала і Якуб Колас – нашы беларускія пісьменнікі.) А цяпер адкрыйце падручнік на старонках 10 – 11. Там вы ўбачыце крыху іншыя партрэты гэтых пісьменнікаў. (Чытаю матэрыял падручніка пра гэтых пісьменнікаў.)

-Якія творы Янкі Купалы і Якуба Коласа вы чыталі?

-Што новага вы даведаліся пра Янку Купалу і Якуба Коласа?

-А якіх вы яшчэ ведаеце беларускіх пісьменнікаў?

-Вы сёння проста малайцы! За лета ўсё не забылі! А ў нас яшчэ адзін канверт застаўся: САКРЭТ №7. І зноў адкрываць канверт будзе той, хто першым адгадае наступную загадку: На стэлажы ўздоўж сцяны стаяць, чакаюць нас яны.

Хто з імі размаўляе, той многа-многа знае. (Кніга)

-Малайчына! Што ж у апошнім канверце? (Кніга Ніла Гілевіча “Добры чалавек”.) (Паказваю яе ўсяму класу.) У гэтай кнізе ёсць вершы, казкі, небыліцы. А я хачу прачытаць вам верш, які называецца “Пасля канікул”:

Ізноў гамонка поўніць класы

Як вулей, школа ўся гудзе.

Пра лета слаўнае расказы

Дзятва, сабраўшыся, вядзе.

Хто – пра паходы ў захапленні,

Пра сотні ўцех і розных спраў,

А хто – пра песні і легенды,

Што ў родным краі назбіраў.

Хто бераг рэчкі ўспамінае,

Хто – мора ласкавую шыр,

А хто гербарыі вымае –

Дарунак школе ад душы.

Ва ўсіх і радасць, і заслуга:

Цудоўна лета правялі.

Найлепш жа той, хто з поля, з луга

Прынёс у жменях… мазалі.

-У гэтым вершы ёсць усё: і адпачынак, і праца. А кожны чалавек павінен добра працаваць, тады і адпачываць лепш. А якая ж галоўная праца ў вас?

(Вучоба).

Правільна. А зараз закрыйце вочкі:

-Успомніце наш урок з самага пачатку.

-Усміхніцеся таму, што у вас добра атрымлівалася, што вам спадабалася.

-Цяпер успомніце, а што ж у вас выклікала цяжкасці і чаму.

-Настройце сябе на тое, што вы ўсё зможаце, калі будзеце старацца.

-Пажадайце сабе і сваім таварышам поспехаў.

-А цяпер адкрыйце вочкі. Яшчэ раз усміхніцеся.



-А я яшчэ раз хачу вам пажадаць усяго найлепшага, поспехаў у новым навучальным годзе, каб вы любілі і шанавалі сваю родную беларускую мову, каб вы маглі не толькі чытаць і пісаць на беларускай мове, але і думаць на ёй. Тады будзе жыць наша мова і наш народ. Будучае за вамі! Поспехаў вам! Дзякую за ўрок!


База данных защищена авторским правом ©shkola.of.by 2016
звярнуцца да адміністрацыі

    Галоўная старонка